Poslije osam godina na tržištu uz nekoliko ažuriranja, druga generacija Peugeota 308 odlazi u penziju. Njegov nasljednik je stigao, i zaista bio je vrijedan čekanja. Istinski rival VW Golfa izgleda potpuno novo, još kada se tome doda potpuno novi logotip koji krasi prednju masku, taj osjećaj je još izraženiji. Kao što se moglo i očekivati, i 308 je dobio lavlje očnjake izrađene od dnevnih LED svjetala koja se protežu niz prednji branik, čime je novi 308 usklađen sa najnovijim Peugeotovom proizvodima. Prednja maska je preuzeta sa nedavno ažuriranih 3008 i 5008 modela, a uz nju su tanki matrix LED farovi za GT i GT Pack verzije.

Sa zadnje strane nalaze se full LED svjetla, kojim se pridružuje sjajna crna pločica koja se proteže preko zadnjih vrata, ali bez ugrađene svjetlosne trake kakva se vidi kod mnogih drugih novih autmobila. Predstavljene nijanse su Olivine Green i Vertigo Blue, ali kupci će naravno moći dobiti 308 i u drugim bojama, uz mogućnost izbora aluminijumskih naplataka od 16 do 18 inča. Kao što je to inače praksa, nova generacija dobija i nešto veće dimenzije od prethodnika, pa je tako novi 308 sa 4,36 m duži od prošle generacije za 11 cm. Osim toga, međuosovinsko rastojanje je produženo za 55 mm pa sada iznosi 2,675 mm čime je obezbijeđen dodatni prostor na zadnjoj klupi. Uglađenijem obliku doprinosi spuštena linija krova jer je visina pala za 20 mm na 1,44 m, što Peugeotu omogućava da smanji koeficijent otpora na 0,28.

U unutrašnjosti novog 308 došlo je do prave revolucije u tolikoj mjeri da uveliko podsjeća na neke konceptne automobile. Peugeot je poznat po svojim avangardnim kontrolnim tablama, pa tako i novi 308 nije izuzetak. Skuplje verzije dobijaju 10-inčni digitalni displej vozača prećen centralnim ekranom osjetljivim na dodir iste veličine koji se standardno isporučuje. Neki fizički prekidači i dalje su prisutni, ali ipak je većina funkcija prebačena u sam infotainment sistem, što je i inače praksa i kod drugih proizvođača kako bi se maksimalno očistila centralna konzola.

Od bežičnog punjača i ambijentalnog osvjtljenja od osam boja, do Focal zvučnog sistema sa 10 zvučnika i električno podesivih sjedišta, unutrašnjost ima sve vrhunske pojedinosti koje može da ima jedan hatchback. Postoji čak i funkcija Clean Cabin koja filtrira zagađujuće gasove i čestice, dok istovremeno prikazuje kvalitet vazduha na glavnom displeju. Iako je 308 narastao u veličini, teretni kapacitet je neznatno smanjen sa 420 litara na 412 litara. Preklapanjem zadnjih sjedišta zapremina raste na 1,323 litara.

Vozeći se na evoluciji EMP2 platforme, novu generaciju 308 modela pokretaće trocilindrični motor koji se nudi u dvije varijante. 1,2-litarski benzinski agregat razvija 110 i 130 KS koji se šalju na točkove putem šestostepenog manuelnog ili opcionog osmostepenog mjenjača za snažniju verziju. Boje dizela brani četverocilindrični 1,5-litarski motor koji ima 130 KS i takođe dolazi sa izborom od dvije transmisije. Na lansiranju će biti predstavljena i dva plug-in hibridna modela sa pogonom na prednje točkove sa osmostepenim automatskim mjenjačem, baterijom od 12,4 kWh i elektromotorom snage 81 kW u oba slučaja. Razlika između dva modela je u benzinskoj jedinici koja u slabijoj varijanti ima snagu od 150 KS, dok snažnija raspolaže sa 180 KS. Kombinovana snaga iznosi 180 KS, odnosno 225 KS za moćnijeg lava. Obe varijante će imati električni domet od 60 km prema WLTP-u.

Proizveden u Francuskoj u Stellantisovoj fabrici Mulhouse, novi Peugeot 308 kreće u prodaju u Evropi u drugoj polovini godine. Cijena novog 308 na njemačkom tržištu kreće od 23,000 eura. Nedavni špijunski snimci nagovještavaju da je u planu i praktičnija karavanska verzija.